My Favourite Gel eyeliner

أتوقع مافيه بنت ما تحب الكات آيز أو الآيلاينر بكل أشكاله ، عن نفسي أعتبره من أساسيات مكياجي وما أستغني عنه أبدا . الآيلاينر له أنواع كثيرة في السوق مثل : الجل - السايل - القلم . يعتبر الجل و السايل من أقوى الأنواع ويعطيك اللون الغامق مثل ماتبين ، بالنسبة لي أرتاح مع الجل لاينر للكات آيز وتمرست يدي عليه ما أنكر إنه في البدايات كان صعب بس مع التعود أخذت عليه وصار شي سهل  ، بس فيه بنات يحبون السايل يحسونه سهل وتقدري تتحكمي فيه أكثر.

جربت أنواع كثيرة من الجل الآيلاينر و صراحة ما عجبني إلا اثنين و أحسهم أقوى و أفضل شي في السوق من ماركات الهاي إند أو الدرق ستور اللي هما إنقلوت و ميبلين راح أتكلم عنهم في هذا البوست والفرش اللي أستعملها معهم. الاثنين يعطون نفس الشي وراح تشوفون السواتش بالاخير نفس النتيجة من ناحية السواد الفاحم - الثبات - القوام كريمي. جربت ماك حلو بس سواده مو مره فاحم وغير كذا مشكلته ينشف معاك بسرعة ما يكمل معك شهر.. بوبي براون ثباته متوسط يعني بنص المناسبة تلقينه ملطخ على جفنك ماحبيته أبد.

إنقلوت رقم ٧٧ | Inglot # 77

راح أبتدي في إنقلوت الحب و اللي طحت في غرامه الصراحة ، رقمه ٧٧ وهو اللون الأسود الوحيد عندهم و ضد الماء. سواده مررره فاحم مطفي وهذا اللي أحبه بالآيلاينرز ! غير كذا قوامه جدا كريمي راح يسهل عليك كثير لما ترسمينه بالفرشة بس ممكن المبتدئات راح يواجهون صعوبة معه بالرسم لما يتلخبطون ومايتحكمون فيه شوي  وهذي مشكلتها سهلة أهم شي ثبتي يدك . له تقريبا ٦ شهور عندي وما نشف معي 

التقييم :

رائع أعطيه ١٠/١٠ من دون تفكير !! ثبات وسواد وقوام والعلبة فيها كمية كبيرة 

.................

 Maybeline Studio liner | ميبلين ستوديو لاينر

ميبلين غني عن التعريف ومشهور عند البيوتي قوروز ! أتوقع ما فيه أحد ما مدحه وبالحقيقة يستاهل كمية المدح اللي جاه. هو أفضل الجل لاينرز من الدرق ستور وكمان سعره مناسب للجميع ٢٨ ريال بس ويعطي نتيجه رائعه بالثبات والسواد وممكن قوامه أثقل من إنقلوت بشوي بس يظل قوامه كريمي وممتاز 

التقييم :

 أعطيه ٩/١٠ والسبب مو فيه لا في الفرشة اللي تجي معه بس ، غير كذا جميل و أنصح فيه

................

 الفرش اللي أستخدمها في رسم الآيلاينر اللي هي الفرشة المشطوفة برأيي هي أسهل من غيرها بالرسم ومرتاحة معها كثير ، اللي هما سيقما رقمها E65 ومن مــاك رقمها 208 

* نصيحة :

طبعا الكل يعاني إنه الجل لاينر بعد فترة ينشف وفيه حلول كثيرة عشان تتفادين هالمشكلة أو تقللين منها ، ممكن تستعملين قطرات الدرالين هذي تستعملينها إذا نشف معك الجل تحطين قطرة أو قطرتين منه وراح يرجع معك مثل ماكان . بس إذا ما عندك القطرات حل سهل وبسيط وهو اللي معتمدة عليه وما ينشف معي و هو لما تخلصين من استخدام الجل اقلبي العلبة راح يقلل من دخول الهواء للعلبة وماينشف معك ! جربوها وراح تحسون بالفرق

هنا فيديو توضيحي كيف رسم الكات آيز ، ومستخدمة انقلوت  

................